Thèid fo-èisteachd a chumail aig Cùirt an t-Siorraim san Òban Diardaoin, air thoiseach air rannsachadh tubaist bhàsmhoir mu dhithis a chaill am beatha sa bhaile ann an 2018.
Chaidh Oskars Rancevs a shaoradh bho chasaidean Martyn Smith a mhurt, agus a nàbaidh, John Whyte a mharbhadh, air sàilleibh a dhroch shlàinte-inntinn.
Cho-dhùin britheamh ann an 2020 gum bo chòir do Mhgr Rancevs a bhith fo ghrèim airson ùine neo-dheimhinnte aig ospadal na stàite ann an Caisteal Tarrais (Carstairs).
Thèid moladh aig an fho-èisteachd air cò a bu chòir a bhith an sàs san rannsachadh agus dè cho farsainn 's a bhios e, a bharrachd air clàr-ama a stèidheachadh air a shon.
Tha Oifis a' Chrùin ag ràdh gur e an t-adhbhar airson rannsachadh tubaist bhàsmhoir ach feuchainn ri dearbhadh dè thug bàs do neach, agus ciamar a dh'fhaodar cunnart bàis a lùghdachadh ann an suidheachaidhean coltach ris.
Tha dùil gum bì ùidh gu sònraichte san leigheas a bha Oskars Rancevs a' faighinn bho sgioba slàinte-inninn anns a' choimhearsnachd.
Bidh ùidh cuideachd anns an dòigh sa bheil seirbheisean slàinte-intinn a' dèiligeadh ri euslaintich nach eil a' gabhail ri leigheas no taic.
Tha dùil cuideachd gun tèid sùil a thoirt air mar a chaidh fiosrachadh a làimhseachadh le Poileas Alba, agus an dàil a bh' ann mus d' fhuair iad lorg air Mgr White na dhachaigh.
