Dh'ainmich na poilis fireannach a chaill a bheatha air a' Ghàidhealtachd Diciadain an dèidh do mhotar-baidhseagal bualadh ann.
Bha Aonghas Ros, 85, a' coiseachd air an A836 faisg air Inbhir Sin ann an Cataibh mu 11.30m. nuair a thachair an tubaist.
Bhàsaich Mgr Ros, a bhuineadh do dh'Àird Ghaoithe, aig làrach na tubaiste. Chaidh fear, 49, a bh' air a' mhotar-baidhseagal, a sgèith a dh'Ospadal Rìoghail Obair Dheathain airson cùraim.
Tha Poileas Alba a' sireadh fiosrachaidh mu na thachair agus dh'iarr iad air daoine a bha sa sgìre aig an àm thighinn air adhart.
Thuirt an Sairdseant Niall Dòmhnallach: "Tha ar smuaintean le càirdean agus caraidean Aonghais aig an àm dhuilich seo. Bidh sinn a' cumail taic riutha fhad 's a nì sinn sgrùdadh."
Ann am brath-naidheachd thuirt teaghlach Mhgr Rois: "'S e buille mhòr a tha seo dhuinn gun do chaill sinn Aonghas air an robh gràdh mòr aig an teaghlach air fad."
