ندیم انجم د ای اېس ای نوي مشر په توګه رسماً دنده پیل کړه

د پاکستان پوځي استخباراتي ادارې ای اېس ای نوي مشر ډګر جنرال ندیم احمد انجم د دې ادارې د مشر په توګه رسماً دنده پیل کړه. نوموړی پر دې دنده له ګومارل کېدو مخکې د کراچۍ قول اردو قومندان په توګه دنده درلوده.

ډګر جنرال ندیم انجم به د ای اېس ای مخکیني مشر ډګر جنرال فیض حمید ځایناستی شي، چې اوس د پېښور ۱۱ قول اردو قومندان په توګه ګومارل شوی دی.

پاکستاني پوځ د تېر اکتوبر میاشتې پر شپږمه نېټه د جنرال انجم د ګومارنې اعلان وکړ، خو د پاکستان لومړي وزیر عمران خان درې اونۍ وروسته د نوموړي ګومارنه تایید کړه.

د بي بي سي خبریاله فرحت جاوېد په خپل رپوټ کې وايي، د پاکستان پوځ پنجاب پوځي قطعې اړوند جنرال انجم د دفاعي زدکړو له شاهي کالجه زدکړې ترلاسه کړې او په بلوچستان، قبایلي سیمو او کراچۍ کې یې پوځي دنده ترسره کړې.

په قبایلي سیمو کې د پاکستان پوځي عملیاتو پر مهال جنرال انجم د لوا مشر په توګه دنده درلوده.

په کراچۍ کې د پوځیانو له لوري د پولیسو ځايي مشر تښتول کېدو له ادعاوو وروسته نوموړی د ډګر جنرال همایون عزیز پر ځای د کراچۍ قول اردو قومندان ټاکل شوی و.

د یادونې ده، چې په افغانستان کې واک ته د طالبانو له رسېدو وروسته کابل ته له جنرال انجم مخکې د ای اېس ای مشر جنرال فیض حمید ناڅاپي سفر ناندرۍ راپورته کړې.

د تېر سپتمبر پر شپږمه د جنرال فیض حمید هغه تصویر ډېر لاس په لاس شو، چې د کابل یوه هوټل کې د چایو پیاله په لاس کې ولاړ پکې لیدل کېږي.

نوموړي خبریالانو ته هغه مهال وویل: ''هر څه به سم شي، خواشیني کېږئ مه.

د ګڼ شمېر کسانو په اند د نوموړي دا سفر د یوه بل هېواد په کورنیو چارو کې څرګنده لاسوهنه وه، ځینو ان د افغانستان پنجشېر ولایت په جګړه کې د پاکستاني څارګرو ادارو د ښکېلتیا ادعا کوله.

د بي بي سي خبریال خدای نور ناصر په رپوټ کې ویل شوي، جنرال حمید داسې مهال په خیبر پښتونخوا ایالت کې د پوځ تر ټولو لوړ پوړی قومندان ګومارل کېږي، چې پاکستان حکومت وايي، په قبایلي سیمو کې له پاکستاني طالبانو سره خبرې کوي.

پر همدې بنسټ ویل کېږي، ښايي جنرال حمید له افغان طالبانو سره د خپلو اړیکو له لارې پر پاکستاني طالبانو د یوې هوکړې لپاره فشار راوړي.

پر نوموړي داسې تورونه هم ولګېدل، چې د خپل هېواد پر محاکمو د اغېز هڅې یې کړې.

د پاکستان مخکیني لومړي وزیر نواز شریف لور مریم نواز پر نوموړي تورونه پورې کړي وو، چې د دوی پر ضد یې د محکمو او احتساب په چارو کې لاسوهنه کوله.

د بي بي سي خبریال شهزاد ملک وايي، د ۲۰۱۷ کال تحریک لبیک مذهبي ګوند تاوتریخجن احتجاج لړ کې هم د جنرال فیض حیمد نوم یادیده.

نوموړی هغه مهال د ای اېس ای یوې څانګې اړوند افسر و.

هغه مهال د پاکستان حکومت او تحریک لبیک تر منځ هوکړې رامنځته کېدو لړ کې ویل کېدل، چې په منځګړو کسانو کې جنرال فیض حمید هم شامل و.

د پاکستان سترې محکمې هغه مهال دفاع وزارت ته د هغه پرلت په هکله پرېکړه کې ویلي و، ''په سختۍ سره باید خپل هغه افسران تعقیب کړئ، چې له لوړې سرغړوونه کوي او په سیاسي چارو کې لاسوهنه کوي. ''

د پاکستان دفاع وزارت وروسته د محکمې پر دې پرېکړه د بیا غور او په پرېکړه کې د دې ټکو بېرته اخیستو درخواست کړی و.