سلګونه خلک وايي، په اسمان کې یې ګرځنده لمبه لیدلې

په سکاټلنډ او شمالي ایرلنډ کې سلګونو خلکو ویلي، په اسمان کې یې یو داسې ستوری لیدلی، چې لمبه یې کوله او په ځغاسته تېر شو. بریتانیا کې د شهابي شبکې مسوولین وايي، دوی ته سلګونو کسانو رپوټ ورکړی، چې له ځايي وخت سره سم یې د چهارشنبې پر شپې لس بجې د اور یو غونډوسکی په اسمان کې لیدلی.

د ساینسپوهانو په خبره د خلکو اخیستل شویو ویډیويي کلیپونو په مرسته پوه شول، چې دا یوه شهابي ډبره وه. هغه ډبره چې له تشیاله د ځمکې چاپېریال ته ننوځي شهاب ثاقب یا شهابي ډبره بلل کېږي، خو د سټیلایټ برخو په څېر د انسانانو په لاس جوړ شوي توکي چې د ځمکې له مداره بهر ګرځي، فضايي خځلې بلل کېږي.

ویل کېږي، داسې لسګونه زره توکي په فضا کې ګرځي چې له لس سانتي مترو لوی دی او که چې د ځمکې مدار ته ننوځي، د شهابي ډبرو په څېر لمبه کوي.