උතුරු කැරොලිනා හි හදිසි තත්වයක්

ඇමරිකාවේ චාර්ලට් නගරයේ දී පොලිසිය විසින් තවත් කළු ජාතිකයෙකු වෙඩි තබා මරා දැමීමෙන් පසු ඇතිවූ උද්ඝෝෂණ සහ කලහකාරී ගැටුම් උත්සන්න වීම හේතුවෙන් උතුරු කැරොලිනා ප්‍රාන්තයේ හදිසි තත්වයක් ප්‍රකාශයට පත්කොට ඇත.

කෝපයටපත් විරෝධතාකරුවන් සහ පොලීසිය අතර ගැටුම් හට ගැනුණු අතර අලුයම් යාමය වන විට පිරිස් විසිරයාම ආරම්භ වූ බවයි නවතම වාර්තාවලින් පැවසෙන්නේ.

කැරලිමර්ධනය සඳහා ජාතික ආරක්ෂක බලකායන් නගරයට කැඳවා ඇත.

බලධාරීන් පවසන්නේ කලහකාරී ගැටුම් අතරතුර සාමාන්‍ය වැසියෙක් දරුණු තුවාල ලබා ඇති අතර එම සිදුවීමට පොලීසිය සම්බන්ධ නැති බවයි.

පොලීසිය විසින් කීත් ලෙමන්ට් ස්කොට් නම් කළුජාතිකයා මරා දැමීමෙන් පසුවයි උද්ඝෝෂණ සහ ගැටුම් ආරම්භවූයේ.

ඔහු ගිනි අවියක් අතැතිව සිටි බව පොලීසිය පවසන අතර ස්කොට් ගේ පවුලේ අය පවසන්නේ ඔහු නිරායුධව සිටි බවයි.