වර්තමානයේ දී ලොවින් අඩකට ආසන්න ප්‍රමාණයක් සමාජ මාධ්‍ය ජාල භාවිත කරති; ෆේස්බුක්, ට්විටර්, ඉන්ස්ටග්‍රෑම්වල සිට වයිබෝ, වී චැට්, කකාඕ ස්ටෝරි යන මාධ්‍ය ජාල ආසියාව තුළ භාවිත කෙරේ.

බටහිර සහ උතුරු යුරෝපයේ සෑම පුද්ගලයන් දස දෙනෙකුගෙන් නව දෙනෙකුට වැඩි ප්‍රමාණයක් මින් එක් ජාලයකට හෝ සම්බන්ධ වී ඇත.

නමුත්, සමාජ මාධ්‍ය තුළින් යහළුවන් සහ ප්‍රසිද්ධ චරිත අනුගමනය කර ඔවුන්ගේ ජීවිත අප සමග සංසන්දනය කිරීමෙන් ඉතා දුක්ඛිත තත්වයකට පත්වේ.

සමාජ මාධ්‍ය ජාල බහුලව පරිහරණය කරන පුද්ගලයන් සාංකාව, මානසික අවපීඩනය වැනි මානසික රෝගවලට ගොදුරු වීමේ වැඩි අවදානමක් ඇති බව පරීක්ෂණයකින් හෙළි වී තිබේ.

විශේෂයෙන් සමාජ මාධ්‍ය ජාල හේතුවෙන් තමන්ගේ පෙනුම ගැන වැඩි අවධානයක් යොමුකිරීමට සිදුවන බව තරුණියෝ පවසති.

ඒ අතරම සමාජ මාධ්‍ය ජාලවල සාධනීය අංග ගැන ද සමහරු පෙන්වා දෙති. විශේෂයෙන්ම එමගින් තමන්ට නිදහසේ අදහස් දැක්විය හැකි අතර, හුදෙකලා වූ අවස්ථාවක සහනයක් ලබාගැනීමට හැකියාව තිබෙන බව ද ඔවුහු පෙන්වා දෙති.

ලිංගික හිරිහැර පිළිබඳ අදහස් දැක්වීමට කාන්තාවන්ට අවකාශ සැලසුන #MeToo ව්‍යාපාරය එවැනි එක් අවස්ථාවකි.