Raysul Wasaarihii hore ee Pakistan, Imran Khan oo la toogtay

Tebin toos ah

1. 3 Nofembar 2022Maxaabiis burburineysa qabuuraha burcad waa hore la xabaalay

   

   Xigashada Sawirka, Reuters

   Maxaabiista ku xiran dakja El Salvador, ayaa wada burburinta qabuuraha xubnihii kamid ahaan jiray burcadda ee geeriyooday, iyagoo ay dowladdu isku dayayso inay wiiqdo awooddooda.

   Maxaabiista oo ku hubaysan biro iyo burusyowaa weyn, ayaa loo diray xabaalaha Santa Tecla, si ay u burburiyaan qabuuraha magaalada Mara Salvatrucha.

   Sida loo yaqaan kooxda MS-13, ayaa waxaa lag tilmaamaa inay tahay mid kamid ah burcadda ugu naxariista daran adduunka, oo caan ku ah rabshadaha xad ka baxa ah.

   Madaxa xabsiyada dalka, ayaa sheegay in qabuuraha la burburinayo, sababtoo ah "ma jiro argagixiso u qalma in aqoonsi loo sameeyo".

   Osiris Luna, ayaa intaa ku daray in tani ay tahay "sababta aan u baabi'ineyno dhammaan raadadka kooxahan. Dalkan, burcaddu meel ugama bannaana."

   Burburinta qabuuraha ku yaal agagaarka magaalada caasimadda ah ee San Salvador iyo Colón ee ku dhow, ayaa la fulinayaa xilli sannad kasta ay qoysasku booqdaan qabuuraha eheladooda, ee maalinta dhimashada (Día de Muertos).

   Maayarka magaalada, ayaa sheegay in maxaabiistu ay burburiyeen ku dhawaad ​​80 xabaalood, sidoo kalena ay ka takhaluseen qoraallada lagu aqoon karo burcadda.

   Mid kamid ah dadka ubaxa u qaadaya qabriga qaraabadiisa Arbacadii, ayaa sheegay in inkasta oo ay ahaan jirtay "caadi in la arko xubnaha burcadda ah ee gudaha xabaalaha, ha yeeshee wuxuu sheegay in haatan aanay jirin wax la arki karo".

   Sannadkii 2012-kii, dalka El Salvador, ayaa waxay ahayd xiligii ugu badnaa ee lagu dilo dad adduunka oo idil, wixii xilligaas ka dambeeyayna mas’uuliyiintu waxay wadeen olole ka dhan ah kooxaha burcadda ah.

   Xaalad degdeg ah ayaa la dhaqan geliyay tan iyo bishii Maarso, markaasoo rabshado burcad ah ay hal maalin ku dhinteen 62 qof.

   Tallaabooyinkan, ayaa waxay hoos u dhigeen xuquuqaha dastuuriga ah, sida xaquuqda isu imaatinka, waxaana ciidamada ammaanka la siiyay awood dheeraad ah, oo ay ku fulin karaan xarig. Xukunada xubinnimada gaangiska waa la kordhiyey.

   In ka badan 56,000 oo qof, ayaa xabsiga loo taxaabay, kadib markii lagu eedeeyay inay xiriir la leeyihiin kooxo burcad ah.

   Hay’adaha xuquuqul insaanka, ayaa sheegay in tillaabooyinka u ogolaanaya booliiska inay soo xiraan dadka laga shakisan yahay amar la’aan ay horseedeen xarig aan loo meel dayin, oo ay ku jiraan kuwa carruur ah.

   Balse dowladdu waxay ku doodaysaa inay dalka ka dhigeen mid ammaan ah.

   Ugu yaraan 80 qof ayaa ku dhintay xabsiga, tan iyo markii ay bilaabatay xaaladda degdegga ah.

2. 3 Nofembar 2022Digniin laga bixiyey barafka yaalla qeybo kamid ah dunida oo dhalaalaya

   

   Xigashada Sawirka, Getty Images

   Warbixin ay soo saartay Qaramada Midoobay, ayaa lagu sheegay in saddex meelood meel barafka yaalla goobo ku yaalla adduunka ay meesha ka baxayaan marka la gaaro sanadka 2050-ka, sababo la xiriira isbeddelka cimilada.

   Cilmi baadhayaashu, ayaa waxay isticmaaleen xogta dayax-gacmeed, si ay ula socdaan hoos u dhacaa ku dhawaad ​​sagaal iyo toban kun xajmi baraf gaaraya.

   Waxay ku soo gaba gabeeyeen baaritaankoodda, in xitaa haddii kororka heerkulka caalamiga ah laga dhigo mid ka hooseeya hal-dhibic- iyo- shan darajo, barafka yaalla goobaha sida Kilimanjaro ee dalka Tansaaniya iyo Yosemite ee dalka Maraykanka, ay baabi'I doonaan soddon sano gudahood.

   Warbixinta hay'adda Qaramada Midoobay u qaabilsan dhaqanka - UNESCO - ayaa sheegtay in haatan ay tahay xili xeero iyo fandhaal ay kala dhaceen, oo aanan waxba laga qaban karin isbeddellada socda; iyo in qiiqa caalamiga ah loo baahan yahay in si weyn loo dhimo, si loo yareeyo baaba’a ku socda barafka.

3. 3 Nofembar 2022War deg deg ah, Raysul Wasaarihii hore ee Pakistan, Imran Khan oo la toogtay

   Ra'iisal wasaarihii hore ee dalka Pakistan, Imran Khan ayaa lagu toogtay meel ay ka socdeen dibad-baxyo oo ku taalla bari magaalada Lahore, ee dalka Pakistan.

   Imran Khan ayaa waxa la sheegay in toogashadaasi uu dhaawac ka soo gaaray mana cadda halka uu dhaawaca ka soo gaaray.

   Khan, oo 70 sano jir ah ayaa waxa uu hoggaaminayay isu soo bax lagu dalbanayay in doorashooyinka dalkaas dadajiyo.

   Xubno ka tirsan xisbigiisa PTI ayaa sheegay in afar qof oo kale ay waxyeelo soo gaartay balse aysan jirin cid ku dhimatay.

   Sarkaal sare oo Imran Khan u dhaw ayaa wakaaladda wararka AFP u sheegay: "Tallaabadani waxay ahayd isku day dil."

   Warbixintan waa war deg deg ah fafaahinta iyo wixii kale oo ka soo kordha halkan kala soco.

4. 3 Nofembar 2022Mareykanka oo ka hadlay dagaalka ka dhanka ah Al-Shabaab ee Hirshabeelle

   Safaardda Mareykanka ee Soomaaliya ayaa qoraal ay barteeda Twitter-ka ku baahisay waxa ay ku sheegtay in kulan dhexmaray Madaxweynaha maamulka Hirshabelle iyo safiirka Mareykanka ee Soomaaliya looga hadlay arrimo la xirriirka iyo xasilinta Hirshabeelle.

   Waxa ay ballan qaadeen in la sii adkeyn doono dagaalka ka dhanka Al-shabaab ilaa laga adkaado.

   Dowladda Xasan Sheekh ayaa waxa ayaa iclaamisay dagaal ka dhan ah Al-Shabaab.

   Ciidamada dowladda oo garabsanaya maleeshiyada Macawiisleey ayaa dagaal ba'an ku haya kooxda Al-shabaab iyagoo deegaano badan ka qabsaday.

   Ka bood X boggan

   Oggolow X macluumaadka

   Macluumaadkan waxaa daabacay X. Waxaan dalbanayenaa fasaxaaga ka hor inta aan la furin, waxaa laga yaabaa inay isticmaalayaan cookies iyo farsamooyin kale. hadii aad u bahato akhri X xeerarka cokie iyo kan ku saabsan xogta gaarka ah ka hor inta aadan aqbalin. si aad u aragto xogta guji ‘aqbal oo soco’.

   Aqbal horayna u soco

   Digniin: BBC macluumaadka ku qoran bog kale masuul kama ahan

   Dhammaadka X boggan

5. 3 Nofembar 2022Fafaahinta qarax gaystay khasaare isugu jira dhimasho iyo dhawaac oo ka dhacay Muqdisho

   Qarax Miino oo wadada dhinaceeda la galiyay ayaa ka dhacay degmada Dayniile ee gobolka Banaadir, waxaana ka dhashay khasaare isugu jira dhimasho iyo dhawaaca. Gaariga qaraxa lala beegsaday ayaa waxaa saarnaa sida wararku sheegayaan arday iskuuley ah.

   Haddaba si aan u helno faah-faahin ku saabsan sida wax u dhaceen ayaan qadka telefoonka kula xiriirnay afhyeenka ciidamada booliska gaashaanle Sadiiq Aadan (Duudisho).

6. 3 Nofembar 2022K/Waqooyi oo riday gantalladdii ugu badnaa xilli ay sii kordhayso xiisadda gobolka

   

   Xigashada Sawirka, Getty Images

   Xukuumadaha Tokyo iyo Seoul ayaa sheegay in Kuuriyada Waqooyi ay ridday saddex gantaal, xilli ay sii kordhayso xiisadda gobolka. Waxay sheegeen in mid ka mid ah uu ahaa gantaalada riddada dheer Taasi oo dawladda Japan ku kaliftay inay soo saarto digniin degdeg ah oo naadir ah oo ku wajahan dadka oo ah inay guryahooda ku jiraan.

   Waxay ku soo beegmaysaa maalin uun ka dib markii labada Kuuriya ay rideen gantaallo taas oo xiisadda sii kor dhisay.

   Waa tiradii ugu badnayd ee gantaallo ay Kuuriiyada Waqooyi ridaan hal maalin gudaheed.

   Waxay arrintan ku soo beegmaysaa maalin uun ka dib markii Kuuriyada Waqooyi ay ugu hanjabtay Mareykanka iyo Kuuriyada Koonfureed dhoolatuskooda milateri ee wadajirka ahaa, iyadoo sheegtay in "Mareykanka iyo Kuuriyada Koonfureed wajihi doonaan caqabado xun ayna la kulmi doonaan natiijadii ugu xumayd taariikhda".

   Waxaa jira walaac laga qabo in hogaamiyaha Kuuriyada Waqooyi Kim Jong-un uu diyaar garow ugu jiro tijaabadii ugu horeysay ee hubka Nukliyeerka ah.

7. 3 Nofembar 2022Joe Biden oo Donald Trump iyo taageerayaashiisa ku eedeeyay inay dimuqraadiyadda waxyeelaynayaan

   

   Xigashada Sawirka, Getty Images

   Madaxweynaha Maraykanka Joe Biden ayaa sheegay in dadka Maraykanku ay ku qasban yihiin inay u midoobaan sidii ay uga soo horjeedsan lahaayeen "rabshadaha siyaasadeed", isagoo sheegay in dimuqraadiyadda ay ka turjumi doonto warqadda codbixinta doorashooyinka xilliga dhexe ee toddobaadka soo socda.

   Biden ayaa ku eedeeyay madaxweynihii hore, Donald Trump iyo taageerayaashiisa inay wiiqayaan dimuqraadiyadda oo ay sare u qaadayaan nacaybka iyo rabshadaha iyagoo diiday inay aqbalaan natiijada doorashadii madaxtinimada ee sannadkii 2020-kii ka dhacday Mareykanka taas oo madaweyne loogu doortay Joe Biden.

8. 3 Nofembar 2022Faafaahin dheeraad ah oo ka soo baxaysa afar qof oo laga afduubtay Mandera

   Ciidammada ammaanka degmada Lafey ee deegaanka Mandera ee waddankan Kenya ayaa la sheegay inay ku howlanyihiin sidii ay iyagoo badqaba dib ugu soo celin lahaayeen afar qof oo la sheegay in halkaas laga afduubtay.

   Dadka la afduubtay ayaa isugu jira howlwadeenno caafimaad, qof xanuunsanayay iyo darawalkii waday gaariga gurmadka degdega ah ee lagula tegay.

   Illaa iyo haatan lama oga cidda ka dambeysay afduubka hasayeeshee waxa ay mas'uuliyiinta deegaanku eedda dusha kaga tuureen ururka Al-Shabaab.

9. 3 Nofembar 2022Sidee ayey ku dhaqan geli kartaa in hubka laga dhigo Tigray heshiiska la gaaray ka dib?

   Ra'iisul wasaaraha Itoobiya, Abiy Axmed, ayaa sheegay in heshiiska xabbad joojinta ee ay dowladdiisu la saxiixatay saraakiisha ka socotay gobolka Tigray uu dalka u yahay tallaabo wax ku ool ah.

   Dhexdhexaadiyaha Midowga Afrika, madaxweynihii hore ee Nigeria, Olusegun Obasanjo, oo garwadeen ka ahaa heshiiskan ayaa isna sheegay in heshiiska uu bilow u yahay hannaan nabad loogu soo dabaalayo Itoobiya.

   Heshiiskan lagu saxiixay waddanka Koonfur Afrika kaddib laba sanadood oo uu dagaal socday ayaa waxa uu dhigayaa in hubka laga dhigo dagaalyahannada fallaagada TPLF.

   Waxa aynu eegaynaa sida uu ku yimid heshiiska ay dhinacyadu gaareen, iyo sida lagu fulin doonaba. Umuurtaasina waxaa inoo faaqidaya Xirsi Cabdulqaadir Maxamed (Xirsi Neero) oo hore uga tisanaan jiray baarlamaanka federaalka ee Itoobiya.

10. 3 Nofembar 2022

    Assalaamu Calaykum

    Subax wanaagsan. Kusoo dhawaada tebinta tooska ah ee aan ku soo gudbinno wararkii ugu dambeeyay ee Soomaalida iyo calaamka intiisa kalaba.