Muuse Biixi oo ka hadlay xaalaada magaalada Laacaanood

Ku soo dhawaada tebinta tooska ee BBC Somali

Tebin toos ah

14 Maarso 2023Mareykanka, Ingiriiska iyo Australia oo heshiis gaaray.
Shiinaha iyo Ruushka ayaa dhalleeceeyay heshiis dhanka difaaca ah oo ay wada gaareen Mareykanka, Ingiriiska iyo Australia kaas oo Australia u ogolaanayo in la siiyo maraakiibta gujiska ah eek u shaqeya quwada ha Nukliyeerka ah.
Wasaaradda arrimaha dibadda Shiinaha ayaa sheegtay in saddexda waddan ay ku socdaan waddo khaladan oo khatarteeda leh, iyadoo heshiiska ku tilmaantay mid xadgudub ku ah heshiiska caalamiga ah ee xakameynta faafidda hubka nukliyeerka.
Heshiiskan oo loo yaqaan AUKUS ayaa dhigayaa in Maraykanka iyo Britain ay Australia la wadaagaan tignoolajiyada casriga ah ee maraakiibta quusta ee quwada Nukliyeerka ah.
14 Maarso 2023Haweeney horey tuug u ahayd oo loo magacaabay xafiis maaliyadeed.
Xigashada Sawirka, ge
Haweeney u dhalatay dalka Koonfur Africa oo loo xiray inay adegsatay lacag badan oo si khaldan loogu soo diray ayaa haatan loo magacaabay xoghayaha maaliyadda ee guddi heer jaamaceeded ah.
Sibongile Mani ayaa shan sano ka hor waxaa si khaldan akoonkeeda bankiga ugu soo dhacay lacag gaareysa $1m (£700,000), intii ay soo warin lahayd, waxaa ay ku iibsatay telefoon, khamri, iyo waxyaabo kale kahor intaanan gacanta lagu soo dhigin.
Sida laga soo xigtay warbaahinta maxaliga, waxaa lagu xukumay shan sano oo xabsi ah balse xili hore ayaa la soo siidaayay.
Warbaahinta dalka Koonfur Africa ayaa sheegaya in Mani haatan loo doortay xoghayaha maaliyadda ee jaamacadda Walter Sisulu oo ku taalla Bariga magaalada Cape.
14 Maarso 2023Bangiyada Mareykanka oo qarka u saaran inay burburaan iyo saamiyada suuqa Maraykanka oo laga dareemay
Qeyb kamid ah suuqyada lagu kala iibsado saamiyada bangiyada waddanka Mareykanka ayaa weli hoos u sii dhacaya, walo madaxweyne Joe Biden uu dadka dalkiisa u xaqiijiyay in lacagtooda ay badqabto kaddib markii ay burbureen bangiyo uu kamid yahay Silicon Valley.
Goor sii horraysay Mr Biden ayaa khudbad uu ka jeediyay taleefishinka waxa uu ku sheegay inuu samayn doono waxkasta oo uu awoodo si loo ilaaliyo deganaanshiyaha dhaqaalaha.
Suuqyada saamiyada ee guud ahaan Yurub ayaa ku xirmay wax ka hooseeya boqolkiiba laba, halka ay bangiyada wajaheen hoos u dhaca ugu wayn.
Bangiyada Mareykanka ee burburay iyo waxa ay dhaqaalaha dalkaas u gaysan karaan, ayaannu wax ka waydiinnay Cabdisamad Nuur Bidaar.
14 Maarso 2023Muuse Biixi oo ka hadlay xaalaada magaalada Laacaanood
Xigashada Sawirka, Telefishanka Qaranka Somaliland
Qoraalka sawirka, Madaxweynaha Somaliland, Muuse Biixi
Madaxweynaha Jamhuuriyadda iskeed ugu dhawaaqday madaxbannaanidaee Somalilandad oo maanta ka hadlay xaaladda magaalada Laascaanood ee gobolka Sool ayaa sheegay inuu mudnaanta koowaad uu siinayo sidii nabad waarta looga gaari lahaa colaadda ka taagan halkaas.
"Qodobka koowaad ee aan mudnaanta siinayo maanta waa dhibaatada ka jirta gobolka Sool, oo ahayd mid aanan filaynin, arrinta ugu horreysa waa inaan si nabad ah u xalinno xaaladda Laascaanood, dowlad ahaan marwalba waxaan ku dhawaaqaynay xabad joojin iyo in shuruud la'aan la joojiyo dagaalka," ayuu yiri madaxweynaha.
Muuse Biixi ayaa sheegay inay diyaar u yihiin inay soo dhaweeyaan cid walba oo kala shaqaynaysa nabadda gobolka Sool, isaga oo ka digay gacmaha "shisheeye" ee faraha kula jira xaaladda golbolkaas.
Waxau uu mar kale ku eedeeyay dowladda goboleedka Puntland ku lug lahaanshaha dagaalka ka socda Sool, balse Puntland ayaa marar badan beenisay eedeymahaasi.
14 Maarso 2023Dhaawaca guddoomiyaha gobolka Gedo oo loo qaaday Muqdisho
Xigashada Sawirka, FACEBOOK
Faahfaahin dheeraada ayaa ka soo baxaysa weerar saaka lagu qaaday magaalada Baardheere ee gobolka Gedo, halkaas oo siyaasiyiin reer Gedo ah ay ka wadeen qorshe dagaal oo ka dhan ah ururka Al-Shabaab.
Weerar is qarxin ah oo lagu qaaday guriga martida ee magaaladaasi waxa lagu dilay afar askari, waxana ku dhaawacmay dad ka badan toban qof oo uu ku jiro gudoomiyaha gobolka Gedo Axmed Buulle Gareed oo dhaawiciisa loo qaaday magaalada Muqdisho.
Dhinaca kale weerar hoobiyayaal ah oo lagu qaaday magaalada waxa ku dhintay afar qof oo rayid ah.
Al-Shabaab ayaa sheegatay masuuliyadda qaraxaas.
14 Maarso 2023Aqalka sare oo ansixiyay sharciga la dagaallanka argagixisada
Xigashada Sawirka, SONNA
Aqalka Sare ee Baarlamaanka Federaalka Soomaaliya ayaa ansixiyay Hindise Sharciyeedka La-dagaalanka Argagixisada, waxaana wadar ogol ku meelmariyay 29 Senator oo maanta kulanka soo xaadiray.
Golaha Shcabka ee baarlamaanka Soomaaliya ayaa 8-dii bishan ansixiyay hindise sharciyeedkan la dagaallanka Argagixsada, wuxuuna dhaqan galayaa marka uu saxiixo madaxweynaha.
14 Maarso 2023Madaxweynaha Eritrea oo baaq u diray ciidamada Suudaan
Xigashada Sawirka, EPA
Qoraalka sawirka, Madaxweynaha Eritrea Isaias Afwerki
Madaxweynaha Eritrea Isaias Afwerki, ayaa ku booriyay Suudaan inay ka digtoonaadaan “faragelinta shisheeye” oo ay iyaga laftoodu xalliyaan dhibaatooyinkooda.
Madaxweyne Isaias ayaa hadalkan ka sheegay wadahadal uu magaalada Asmara kula yeeshay ku xigeenka madaxa golaha ku meel gaarka ah ee Suudaan, Mohamed Hamdan "Hemeti" oo booqasho hal maalin ah ku yimid dalkaas.
Madaxweynaha ayaa sidoo kale ugu baaqay ciidamada dalka Suudaan inay ka fogaadaan siyaasadda.
Eritrea ayaa la rumeysan yahay inay taageereyso dadaallada lagu xallinayo qalalaasaha siyaasadeed ee Suudaan oo soo jiitamayay tan iyo bishii Oktoobar 2021-kii.
14 Maarso 2023Xiisadda Itoobiya iyo masar oo soo cusboonaatay iyo Jaamacadda Carabta oo ku lug leh
Xukuumadda Qaahira ayaa kulan ay isugu yimaadeen wasiirrada arrimaha dibadda ee Jaamacadda Carabta ay kaga ansixisay in muranka webiga Niil ee dalkaas kala dhaxeeya waddanka Itoobiya laga dhigo ajande ay ka midaysanyihiin xubnaha ku bahoobay jamciyaddaasi.
Ajandahaas ayaa Jaamacadda Carabta waxaa ka gaday wasiirka arrimaha dibadda ee Masar kaas oo haatan la wareegay guddoonka jamciyaddaasi.
Dowladda Itoobiya ayaa dhankeeda sheegtay inay diyaar u tahay in wadahadal lagu dhammeeyo khilaafka webiga Niil.
14 Maarso 2023Faahfaahin ka soo baxaysa qarax saakay lala beegsaday masuliyiin ku sugnaa Baardheere
Waxaa faahaahin dheeraad ah ka soo baxaysa qarax saaka arroornimadii lala beegsaday guri ay daganaayeen masuuliyiin ka tirsan maamulka gobolka Gedo iyo saraakiil ka tirsan ciidamada xoogga dalka oo ku yaalla magaalada Baardheere ee gobolka Gedo.
Warrarka ayaa sheegaya in ugu yaraan shan askari iyo afar qof oo ra'yid ah ay ku dhinteen weerarkaas.
Gaari laga soo buuxiyay walxaha qarxa ayaa la sheegay in lala beegsaday gurigaaas oo ku dhawaa xarumo dowladeed oo ku yaalla gudaha magaalada Bardheere.
Kooxda Al-Shabaab ayaa sheegatay masuuliyadda qaraxaas, sida ay sheegtay warbaahinta taageerta kooxdaas.
Masuuliyiinta halkaas ku sugnaa ayaa la sheegay inay la socdeen wefdi uu hoggaaminayay wasiirkii hore ee amniga maamulka Jubaland, Cabdirashiid Xasan Cabdinuur (Janan).
Waxaa maalmahan siyaabo kala duwan looga hadlayay ciidan tababar looga furay magaalada Baardheere ee gobolka Gedo.
Siyaasiyiinta abaabushay ciidankaas oo ay hoggaaminayaan Senator Cabdullaahi Ismaaciil Fartaag iyo wasiirkii hore ee amniga Jubaland, Cabdirashiid Xasan Cabdinuur (Janan) ayaa ku doodaya in ciidanka uu yahay mid Al-Shabaab looga saarayo deegaannada ay ka joogaan Gedo iyo Jubbada Dhexe.
14 Maarso 2023Baarlamaanka Somaaliya oo xubin ka noqday Ururka Xoghayayaasha Guud ee Baarlamaanada Aduunka
Xigashada Sawirka, SONNA
Xoghayaha Guud ee Aqalka Sare Baarlamaanka, Cabdinaasir Ibraahim Guuleed ayaa ka qeyb galay kulanka guud ee Xoghayayaasha Baarlamaannada Adduunka oo ka dhacay magaalada Manama ee dalka Bahrain, sida ay sheegtay wakaaladda warrarka ee SONNA.
Kadib fadhigii ay yeesheen Guddiga fulinta Xoghayayaasha Baarlamaannada Adduunka ayaa lagu go’aamiyay in Baarlamaanka Soomaaliya uu ku biiro ururka , markii cod aqlabiyad lagu ansixiyay ka mid noqoshada xubinnimada Soomaaliya.
Xoghayaha Guud ee Aqalka Sare Baarlamaanka JFS, Cabdinaasir Ibraahim Guuleed ayaa horay u gudbiyay codsi ku aaddan kamid noqoshada ururka.
14 Maarso 2023Qarax lala beegsaday masuuliyiin ku sugnaa magaalada Baardheere
Wararka ka imaanaya magaalada Bardheere ee gobolka Gedo ayaa sheegaya in saaka qarax lala beegsaday guri ay ku sugnaayeen masuuliyiin ka tirsan maamulka gobolka Gedo iyo saraakiil ka tirsan ciidamada xoogga dalka.
Masuuliyiinta halkaas ku sugnaa ayaa la sheegay inay la socdeen wefdi uu hoggaaminayay wasiirkii hore ee amniga Jubaland, Cabdirashiid Xasan Cabdinuur (Janan).
Ilaa hadda lama oga khasaaraha guud ee ka dhashay weerarkaas balse xogaha laga helayo magaaladaas ayaa sheegaya in isgaarsiinta ay go'antahay.
Waxaa maalmahan siyaabo kala duwan looga hadlayay ciidan tababar looga furay magaalada Baardheere ee gobolka Gedo.
Siyaasiyiinta abaabushay ciidankaas oo ay hoggaaminayaan Senator Cabdullaahi Ismaaciil Fartaag iyo wasiirkii hore ee amniga Jubaland, Cabdirashiid Xasan Cabdinuur (Janan) ayaa ku doodaya in ciidanka uu yahay mid Al-Shabaab looga saarayo deegaannada ay ka joogaan Gedo iyo Jubbada Dhexe.
14 Maarso 2023
Assalaamu Calaykum
Subax wanaagsan. Kusoo dhawaada tebinta tooska ah ee BBC Somali.
Halkan kala soco wararkii ugu dambeeyay ee dhulka Soomaalida, iyo deegaamadooda qurbaha, wararka gobolka iyo calaamka intiisa kalaba.