ኣብ ኢትዮጵያ ብዝሒ ብኮሮናቫይረስ ዝተለኸፉ ሰባት ናብ 16 ሽሕን 615 በፂሑ

ቀጥታዊ ሸፈነ

1. 31 ሓምለ 2020ኣብ ቬትናም ብኮሮናቫይረስ ፈላማይ ሞት ተመዝጊቡ

   

   ምንጪ ስእሊ, EPA

   ቬትናም፡ለበዳ ኮሮናቫይረስ ኣብ መላእ ዓለም ካብ ዝላባዕ ንነጀው፡ ንፈለማ እዋን ብኮሮናቫይረስ ዝሞተ ሰብ ኣመዝጊባ።

   ብመሰረት ሓበሬታ መራኸብቲ ሓፋሽ ቬትናም፡ እዚ ለበዳ ካብ ዝረአ ጀሚሩ ኣብታ ሃገር ዋላ ሓደ ሰብ ብኮቪድ-19 ከምዘይሞተን፡ እዚ ዝሞተ ሰብ’ውን፡ ኣብ ዳግማይ ደግሲ ኮሮናቫይረስ ዝሞተ እዩ።

   ብተወሳኺ ሎሚ መዓልቲ ኣብ ከተማ ዳናንግ 45 ሰባት ብኮሮናቫይረስ ከምዝተለኸፉ ዝተገለፀ እንትኸውን፡ ኣብታ ሃገር ጠቕላላ በዚ ቫይረስ ናይ ዝተለኸፉ ሰባት ብዝሒ ናብ 509 በጺሑ ኣሎ።

   ሰብመዚ እታ ሃገር ነቲ ለበዳ ንምቊጽጻር ይቃለሱ ከምዘለውን፤ 100 ሰብሞያ ሕክምና ድማ፡ ረድኤት ንምሃብ ናብ ከተማ ዳናንግ ተላኢኾም ኣለው።

   ኣብ መስሕብ በፃሕቲ ዓዲ ዝኾነት ከተማ’ውን ለበዳ ኮቪድ-19 ዳግማይ ደጊሱ ይርከብ።

   ኣብ ርእሰከተማ ሃኖይ’ውን፡ መርመራ ኮሮናቫይረስ ይካየድ ከምዘሎን፡ ምትእኽኻብ ከምዝተኸልከለን ተገሊፁ።

   ቬትናም ለበዳ ኮሮናቫይረስ ንምምካት፡ መርመራ ብምክያድን ብስጡም ቀይድታት መገሻን ልዑል ናእዳ ከምዝረኸበት ይፍለጥ።

2. 31 ሓምለ 2020ኣልጀርያ ካብ መዝገብ መገሻ ሕብረት ኣውሮጳ ተኣልያ

   

   ምንጪ ስእሊ, Getty Images

   ሕብረት ኣውሮጳ፡ ንኣልጀርያ፡ ኣብ ግዘ ለበዳ ኮሮናቫይረስ ናብ ሃገራት ኣውሮጳ ካብ ሞንጎ ክጓዓዛ ዝኽእላ ዝርዝር ኣልይዋ።

   ኣብ ኣልጀርያ ለበዳ ኮሮናቫይረስ ዳግማይ ብምድጋስ፡ ኣብታ ሃገር ቁፅሪ ብኮሮናቫይረስ ዝተለኸፉ ሰባት ናብ 29 ሽሕን 229 ክብ ኢሉ ኣሎ።

   ሕብረት ኣውሮጳ፡ ኣብ ሃገራት ዘሎ መጠን ለበዳን ናይ ምቁፅፃር ዓቕመንን ብምምዛን’ዩ፡ ናብ ኣውሮጳ መእተዊ ቪዛ ዝህብ ዘሎ።

   ሃገራት ኣውስትራልያ፣ካናዳ፣ ጆርጅያ፣ ጃፓን፣ ሞሮኮ፣ ኒው ዚላንድ፣ ሩዋንዳ፣ ደቡብ ኮርያ፣ ታይላንድ፣ ቱኒዚያን ኡራጋይን፡ ኣብቲ ዝተመሓየሸ ዝርዝር መገሻ ሕብረት ኣውሮጳ ዝርከባ እየን።

   እዚ ዝርዝር፡ ሃገራት ኣውሮጳ በፃሕቲ ዓዲ ንምትእንጋድ እንተድኣ ደልየን፡ ክጥቀማሉ ዝኽእላ መመርሒ ከምዝኾነ ድማ ተገሊፁ።

3. 31 ሓምለ 2020ቦትስዋና ኣብ ርእሰ ከተማ እታ ሃገር ዳግማይ ዕፅዋ ኣዊጃ

   እዚ ኣብ ርእሰ ከተማ ጋቦሮኔ ሙሉእ ንሙሉእ ዝተኣወጀ ዕፅዋ፡ ንክልተ ሰሙናት ከምዝቕፅል ተገሊፁ።

   ካብ ዝኾነ ክፋላት እታ ሃገር ናብታ ከተማ ዝካየዱ ምንቅስቓሳት ኩሎም፡ ተኣጊዶም ኣለዉ።

   ቦትስዋና ነዚ ዳግማይ ዕፅዋ ዝኣወጀት፡ 30 ሓደሽቲ ብኮሮናቫይረስ ዝተለኸፉ ሰባት ብምርካቦም እዩ።

   እዚ ዕፅዋ ካብ ትማሊ ፍርቂ ለይቲ ጀሚሩ ተግባራዊ ከምዝኾነ ተገሊፁ።

   ኣወሃሃዲ ፍሉይ ሓይሊ ዕማም ሓይሊ ምክልኻል ኮሮናቫይረስ እታ ሃገር ኬሪንግ ማሱቹ፡ “መሰረታዊ ዝኾኑ ኣገልግሎታት ብ 25 ሚእታዊት ዓቕሞም ጥራሕ ይሰርሑ። ኣብዛ ዓባይ ከተማ ጋቦሮኔ ዝኾነ ዓይነት ምንቅስቓስ ኣይፍቀድን። ካብ ጋቦሮኔ ምውፃእ ኮነ ምእታው ተኸልኪሉ እዩ” ኢሉ።

   ኣብ ቦትስዋና 170 ሰባት ብኮሮናቫይረስ ከምዝተለኸፉን፡ ክልተ ሰባት ድማ በዚ ቫይረስ ከምዝሞቱን ይግለፅ።

   Skip X post

   ንትሕዝቶ X ተፍቅድ ዶ?

   እዚ ጽሑፍ ካብ X ዝተረኽቡ ትሕዝቶታት ኣሎዎ። እንተኾነ ኩኪስ ይዅን ካልእ ቴክኖሎጂ ክጥቀሙ ስለዝኽእሉ፡ ቅድሚ ምኽፋቱ ፍቓድኩም የድሊ። ፍቓደኛታት ቅድሚ ምዃንኩም፡ ነቲ ናይ X ፖሊሲ ኩኪስ ከምኡ’ውን ፖሊሲ ብሕትና ክተንብብዎ ትኽእሉ ኢኹም። ነዚ ትሕዝቶ ንምርኣይ፡ ‘እሰማማዕ’የ ቀጽል’ ዝብል ጠውቑ።

   Accept and continue

   Warning: ቢቢሲ ኣብ ካልእ ገጻት ንዘሎ ሓበሬታ ሓላፍነት ኣይወስድን።

   End of X post

4. 31 ሓምለ 2020ኣብ ህንዲ ኣብ ሓደ መዓልቲ 800 ሰባት ብኮሮናቫይረስ ሞይቶም

   

   ምንጪ ስእሊ, EPA

   ኣብ ህንዲ ትማሊ ሓሙስ ጥራሕ ኣብ ሓደ መዓልቲ 800 ሰባት ብኮሮናቫይረስ ከምዝሞቱ ተገሊፁ።

   እዚ ድማ ኣብታ ሃገር በዚ ቫይረስ ናይ ዝሞቱ ሰባት ኣሃዝ ናብ 35 ሽሕን 500 ኣበሪኽዎ ኣሎ።

   ህንዲ፡ ልዑል ቁፅሪ ብኮሮናቫይረስ ዝሞቱ ሰባት ብምምዝጋብ፡ ኣብ ሓምሻይ ደረጃ ተሰሪዓ ትርከብ።

   ህንዲ ኣብዞም ዝሓለፉ 24 ሰዓታት 54 ሽሕ ብኮቪድ-19 ዝተለኸፉ ከተመዝግብ እንከላ፡ ጠቕላላ ኣብታ ሃገር በዚ ቫይረስ ዝተለኸፉ ሰባት ብዝሒ 1 ነጥቢ 6 ሚልየን ሓሊፉ ኣሎ።

   ህንዲ፡ ካብ ኣሜሪካን ብራዚልን ቀፂሉ ልዑል መልከፍቲ ኮሮናቫይረስ ብምምዝጋብ ኣብ ሳልሳይ ደረጃ ተሰሪዓ ትርከብ።

   ለበዳ እቲ ቫይረስ ንምምካት ካብ ዝሓለፈ ወርሒ መጋቢት ጀሚሩ ኣብታ ሃገር ዝተኣወጀ ዕፅዋ፡ ድሕሪ ወርሒ ሰነ በብቁሩብ ክፎክስ ጸኒሑ’ዩ።

   ኣብ ዝሓለፈ ረቡዕ ሚኒስትር ጉዳያት ወፃኢ እታ ሃገር እንዳ ‘ጂምን ዮጋን’ ኣብ ዝቅፅል ሰሙን ከምዝኽፈቱ ምግላጹ’ውን ዝዝከር እዩ።

5. 31 ሓምለ 2020ውድብ ጥዕና ዓለም እገዳታት ዘላሕልሐ ዘለዋ ሃገራት ኣፍሪቃ ኣጠንቂቑ

6. 31 ሓምለ 2020

   ጥዕና ይሃበልና ተኸታተልትና

   ኣብ ኢትዮጵያ ቁፅሪ ብኮሮናቫይረስ ዝተለኸፉ ሰባት 16 ሽሕን 615 በፂሑ።

   እቲ ሕማም ናብ ማሕበረሰብ ብምእታው ካብ ግዘ ናብ ግዘ ብናህሪ ይውስኽ ኣሎ።

   ኣብ ኤርትራ ድማ ቁፅሪ ብኮቪድ-19 ዝተለኸፉ ሰባት 279 እዩ።

   ብውድብ ጥዕና ዓለምን ሰብሞያ ጥዕናን ዝወሃቡ መምርሕታት ብምትግባር ንርእስኹምን ንስድራኹምን ካብ ኮሮናቫይረስ ሓልዉ።

   መሸፈኒ ኣፍን ኣፍንጫን (ማስክ) ግበሩ፣ ርሕቐትኩም ሓልዉ፡ ነንሽዑ ኢድኩም ብማይን ብሳሙናን ምሕፃብ ኣይትዘንግዑ።

   ብሩኽ መዓልቲ

   

7. 30 ሓምለ 2020ተወዳዳሪ ፕረዚደንታዊ ምርጫ ነበር፡ ሀርማን ኬይን ብኮሮናቫይረስ ሞይቱ

   

   ምንጪ ስእሊ, Getty Images

   ኣብ ፕረዚደንታዊ ምርጫ 2012 ሕጹይ ተወዳዳሪ ዝነበረ ኣባል ሪፓብሊካን ሀርማን ኬይን ኣብ መበል 74 ዓመቱ ብኮሮናቫይረስ ዓሪፉ።

   ንሱ ብኮሮናቫይረስ ከም ዝተለኽፈ ድሕሪ ምርግጋጹ ብ 1 ሓምለ እዩ ናብ ሆስፒታል ኣትዩ።

   ኣብ መርበብ ሓበሬትኡ፡ ዝተለጠፈ ጽሑፍ “ሓለቓና፡ ዓርክና፡ ንብዙሓት ካባና ከም ኣቦ ዝነበረ ሀርማን ኬይን ዓሪፉ” ይብል።

   ቀጺሉ’ውን “ፈለማ ናብ ሆስፒታል ምስ ኣተወ፡ እቲ ቃልሲ ቀሊል ከም ዘይከውን ተረድኡና ነይሩ” ይብል።

   እቲ ናይ ማሕበራዊ መራኸቢታት ገጹ፡ ብዛዕባ ኩነታቱ ብቐጻሊ ሓበሬታ ክዝርግሕ እዩ ጸኒሑ።

   ብ 7 ሓምለ፡ ኣብ ናይ ትዊተር ገጹ ዝተዘርግሐ ሓበሬታ፡ ሓካይም ነቲ ኣብ ኣካላቱ ዘሎ ናይ ኦክስጅን መጠን ንምትዕርራይ ይጽዕሩ ከም ዘለው ገሊጹ ብምግላጽ፡ “ኣዝዩ ሓደገኛ ቫይረስ እዩ፡ በጃኹም ምጽላይ ቀጽሉ” ይብል።

   ኣብ 2019 ፕረዚደንት ትራምፕ ኣባል ቦርድ ናይ ፌደራል ሪዘርቭ ክኸውን ረቚሕዎ እኳ እንተነበረ፡ ብዙሓት ሪፓብሊካን ኣባላት ባይቶ ኣሜሪካ ስለዝተቓወምዎ፡ ኬይን ኣንሳሒቡሉ እዩ።

8. 30 ሓምለ 2020ማስክ ምግባር ንኮቪድ-19 ኣየቃልዕን እዩ’ ላዕለዋይ ብዓልሞያ ጥዕና ኣሜሪካ

   

   ምንጪ ስእሊ, Getty Images

   መሸፈኒ ኣፍን ኣፍንጫን ማስክ ምግባር ንኮቪድ-19 የቃልዕ እዩ ንምባል መርትዖ ከም ዘየለ ሓደ ላዕለዋይ በዓልሞያ ጥዕና ኣሜሪካ ተዛሪቡ።

   ኮምሽነር ምምሕዳር መግብን መድሃኒትን ኣሜሪካ፡ ስቲፈን ሃን ነዚ ዝበለ፡ ሓደ ብኮሮቫይረስ ዝተለኽፈ ኣባል ኮንግረስ [ቴክሳስ]፡ እቲ ጠንቂ፡ ዝገበሮ ማስክ ምዃኑ ድሕሪ ምዝራቡ እዩ።

   ኣባል ሪፓብሊካን፡ ሎዊስ ጎመርት ምስ ፕረዚደንት ትራምፕ ካብ ምጋሽ ድሕሪ ምኽልካሉ ኣብ ዝገበሮ ቃለ መሕትት “ማስክ ብምግባረይ ኣብቲ ማስክ ዝዓለበ ቫይረስ ንውሽጢ ኣስተንፊሰ ክኸውን እኽእል እየ” ኢሉ።

   እንተኾነ ግና ማስክ ምግባር ካብ መልከፍቲ ኮሮናቫይረስ እዩ ዝከላኸል። ማስክ ምግባር ንመልከፍቲ እቲ ቫይረስ ዘቃልዕ እዩ ዝብል ሓበሬታ ግጉይ እዩ።

   ዶክተር ሃን ምስ ኤንቢሲ ኣብ ዝገበሮ ቃለ መሕትት ነቲ ሓሳብ ዝድግፍ ሕክምናዊ መርትዖ ከም ዘየለ እዩ ተዛሪቡ።

   “ኣብ ኢድና ዘሎ ሓበሬታ ዘመልክቶ ሰባት ማስክ ክገብሩ ከም ዘለዎም እዩ፤ ብፍላይ ድማ ማሕበራዊ ርሕቐቶም ክሕልው ምስ ዘይክእሉ” ኢሉ።

9. 30 ሓምለ 2020ኣብ እዋን ኮቪድ ብኽብሪ ዝተቐብረ ዲፕሎማት ኣፍወርቂ ኣብራሃ

10. 30 ሓምለ 2020ፕረዚደንት ዶናልድ ትራምፕ ምርጫ 2020 ኣመሪካ ክናዋሕ ጸዊዑ

11. 30 ሓምለ 2020ፍሎሪዳ ማእኸላት መመርመሪ ኮሮናቫይረስ ክትዓፁ እያ

    

    ምንጪ ስእሊ, Getty Images

    ብኮሮናቫይረስ ኣዝየን ካብ ሞንጎ ዝተጠቕዓ ግዝኣታት ኣሜሪካ ሓንቲ ዝኾነት ፍሎሪዳ፡ ብሰንኪ ናብታ ከተማ ይመፅእ ዘሎ ህቦብላ ማእኸላት መመርምሪ ከምትዓፁ ኣፍሊጣ።

    ሰብመዚ ቢሮ ምክልኻል ሃንደበታዊ ሓደጋታት እታ ግዝኣት ከምዝሓበርዎ፡ እቶም ማእኸላት ምርመራ፡ ኣሰራርሕኦም ነቲ ዝመፅእ ሓደጋ ዘይፃወሩን ጉድኣት ከስዕቡ ዝኽእሉን እዮም።

    እቶም ማእኸላት ምርመራ ካብ ሎሚመዓልቲ ጀሚሮም ንዘይተወሰነ ግዘ ከምዝዕፀዉ ድማ ተገሊፁ።

    እዚ ህቦብላ ኣብ ሰዓት 80 ኪሎሜትር ከምዝጓዓዝን ኣብ መወዳእታ እዚ ሰሙን ናብ ፍሎሪዳ ከምዝበፅሕን እዩ ተገሊፁ ዘሎ።

    21 ሚልየን ህዝቢ ኣብ ዝነብረላ ፍሎሪዳ፡ ዛጊድ 450 ሽሕ ሰባት ብኮሮናቫይረስ ዝተለኸፉ እንትኾኑ፡ 6300 ሰባት ድማ በዚ ቫይረስ ሞይቶም።

12. 30 ሓምለ 2020ህንዲ እንዳ 'ጂምን ዮጋን' ዳግማይ ምስኸፈተት ልዑል መልከፍቲ ኮሮናቫይረስ ኣመዝጊባ

    ኣብቶም ዝሓለፉ 24 ሰዓታት፡ ጥራይ ኣብ ህንዲ ልዕሊ 52 ሽሕ ሰባት ብኮሮናቫይረስ ከምዝተለኸፉ ተረጋጊፁ።

    ኣብ ግዝኣታት ማሃራሽታራ፡ ታሚሊን፡ ኣንድራ ፓራዲሽን ልዑል መልከፍቲ ምግጣሙ ቀፂሉ ኣሎ።

    ህንዲ፡ ካብ ኣሜሪካን ብራዚልን ቀፂሉ ልዑል መልከፍቲ ኮሮናቫይረስ ብምምዝጋብ ኣብ ሳልሳይ ደረጃ ተሰሪዓ ትርከብ።

    ኣብታ ሃገር ዛጊድ ኣስታት 35 ሽሕ ሰባት ብኮሮናቫይረስ ሞይቶም እዮም።

    ካብ ግዘ ናብ ግዘ ቁፅሪ ብኮሮናቫይረስ ዝልከፉ ሰባት ዋላ'ኳ እንተወሰኸ፡ መንግስቲ እታ ሃገር ግና ዘንበሮም ክልከላታት ብምፉካስ፡ ካብ 5 ነሓሰ ጀሚሩ እንዳ 'ጂምን ዮጋን' ክኸፈቱ ወሲኑ ኣሎ።

13. 30 ሓምለ 2020ፕረዝደንት ጋምቢያ ተወሺቡ

    

    ምንጪ ስእሊ, Getty Images

    ፕረዝደንት ጋምቢያ ኣዳማ ባሮው፡ ምክትሉ ብኮሮናቫይረስ ምልካፋ ስዒቡ፡ ከምዝተወሸበ ተገሊፁ።

    እቲ ፕረዝደንት ንክልተ ሰሙን ዝውሸብ ኮይኑ፡ ኣብ መንግስታዊ ስራሕቲ'ውን ኣይክሳተፍን።

    ምክትል ፕረዝደንት ኢሳቱ ቱራይ ብኮሮናቫይረስ ከምዝተለኸፈት፡ መግለፂ ቤት-ፅሕፈት እቲ ፕረዝደንት ሓቢሩ።

    ኢሳቱ ቱራይ፡ "ኣብ ፅቡቕ ኩነታት ጥዕና ከምትርከብን ናብ ማእኸል መወሸቢ ከምትኣቱን ኣፍሊጣ።

    ኣብታ ሃገር ዛጊድ 326 ሰባት ብኮሮናቫይረስ ከምዝተለኸፉን ሸሞንተ ሰባት ከምዝሞቱን ይግለፅ።

    መንግስቲ እታ ሃገር ዜጋታቱ መሸፈኒ ኣፍን ኣፍንጫን (ማስክ) ክገብሩን ርሕቐቶም ክሕልዉን ይፅውዕ።

14. 30 ሓምለ 2020መሸፈኒ ኣፍን ኣፍንጫን ዘይገብሩ ኣባላት፡ ካብ ባይቶ ኣሜሪካ ክስጎጉ እዮም

    

    ምንጪ ስእሊ, REUTERS

    ኣፈ ጉባኤ ባይቶ ኣሜሪካ፡ ኩሎም ኣባላትን ሰራሕተኛታትን እቲ ባይቶ መሸፈኒ ኣፍን ኣፍንጫን (ማስክ) ክገብሩ ኣዚዛ።

    ኣፈ ጉባኤ ናይቲ ባይቶ ናንሲ ፔሎሲ፡ ነዚ ሓድሽ ሕጊ ንዝጥሕስ ዝኾነ ይኹን ኣባል፡ ካብ ኣዳራሽ ናይቲ ባይቶ ክስጎግ ምዃኑ ድማ ኣጠንቂቓ ኣላ።

    ናንሲ ፔሎሲ፡ መሸፈኒ ኣፍን ኣፍንጫን ዘይገብሩ ኣባላት ከምዝስጎጉ ዘጠንቀቐት፡ ኣባል እቲ ባይቶ ዝኾነ ሪፐብሊካን ሉዊ ጎህመርት ትማሊ ረቡዕ ብኮሮናቫይረስ ምልካፉ ስለዝተረጋገፀ እዩ።

    ንምሉእ እቲ ዛንታ ኣብ'ዚ ክተንብብዎ ትኽእሉ።

15. 30 ሓምለ 2020ኣውስትራልያዊት ግዝኣት ቪክቶርያ ልዑል መጠን መልከፍቲ ኮሮናቫይረስ ኣመዝጊባ

    

    ምንጪ ስእሊ, EPA

    ኮሮናቫይረስ ኣዝያ ዝተሃሰየት ኣውስትራልያዊት ግዝኣት ቪክቶርያ፡ ኣዝዩ ዝኸፍአ ወሰኽ ሞትን ሓድሽ መልከፍትታት ኮሮናቫይረስን ከምዘመዝገበት ተገሊፁ።

    ርእሰ ከተማ ናይታ ግዝኣት ኣብ ዝኾነት ከተማ መልበርን፡ ንሽድሽተ ሰሙናት ዝተኣወጀ ዕፅዋ "ኣይሰርሕን ግዲ ዘሎ?" ዝብል ስግኣት ድማ ኣሕዲሩ።

    እዛ ግዝኣት ሎሚ ሓሙስ ከም ዘፍለጠቶ፡ 723 ሓድሽ መልከፍቲ ኮሮናቫይረስን 13 ሞትን ዘመዝገበት እንትትኾን፡ ካብቲ ኣብ ዝሓለፈ ሰኑይ ዝተመዝገበ ብዝሒ ብ36 ሚእታዊት ዝዛየደ እዩ።

    ነዚ ስዒቡ ድማ፡ እቲ ኣብ ከተማ መልበርን ካብ 7 ሓምለ ጀሚሩ ተኣዊጁ ዘሎ ዕፅዋ ክናዋሕ እዩ ዝብል ፍርሒ ዓሲሉ ይርከብ።

16. 30 ሓምለ 2020ኣብ ኢትዮጵያ፡ ብዝሒ ብኮሮናቫይረስ ዝተለኸፉ ሰባት ናብ 16 ሽሕ ይጽጋዕ ኣሎ።

    

    ሚኒስትሪ ጥዕና ናይታ ሃገር ትማሊ ረቡዕ ዘውጸኦ መግለጺ፡ ዛጊድ 15810 ሰባት በቲ ቫይረስ ከምዝተትሓዙ የረድእ።

    ኣብ’ቲ ዕለት 610 ተወሰኽቲ በቲ ቫይረስ ዝተለኸፉ ሰባት ከምዝተረኸቡ’ውን ገሊጹ።

    ካብ’ዚ ብተወሳኺ፡ 14 ተወሰኽቲ ሰባት ድማ በቲ ሕማም ሞይቶም።

    በዚ ድማ፡ ብዝሒ ኣብ ኢትዮጵያ ብኮሮናቫይረስ ዝሞቱ ሰባት 253 በጺሑ’ሎ።

    ብደረጃ ዓለም ድማ፡ ብዝሒ መልከፍቲ ልዕሊ17 ሚልዮን ኮይኑ ኣሎ።

    ኣብ ዓለምና፡ ብዝሒ በዚ ሕማም ዝሞቱ ሰባት ድማ ልዕሊ 660 ሽሕ እዩ።

17. 29 ሓምለ 2020ኣሜሪካ መጠን ሞት ምጉዳል ይከኣል ነይሩ፡ ዶክተር ፋውቺ

    

    ምንጪ ስእሊ, Reuters

    ላዕለዋይ ክኢላ ተመሓላለፍቲ ሕማማት ኣሜሪካ ዶክተር ኣንቶኒ ፋውቺ "ፖለቲካዊ ቖይቊ" ኣድላዪ ከም ዘይኮነ ተዛሪቡ፤ ንሱ ነዚ ዝበለ፡ ፕረዚደንት ትራምፕ፡ ንግኑንነቱ ኣብ ሕቶ ምልክት ድሕሪ ምእታው እዩ።

    ዶክተር ፋውቺ ንቢቢሲ ኣብ ዝሃቦ ርእይቶ “ሕጂ ጸላኢና እቲ ቫይረስ እዩ፤ ፖለቲካዊ ቖይቊን ፖለቲካዊ ቅልስን እነእንግደሉ እዋን ኣይኮነን” ኢሉ።

    ንሱ ወሲኹ፡ ካብቲ ኣብ ኣሜሪካ ዘጋጠመ ሞት 150 ሽሕ ሰባት፡ ገሊኡ ክውገድ ዝኽእል ምንባሩ ተዛሪቡ።

    “ህዝባዊ መምርሒታት ጥዕና ተግባራዊ ተገይሩ እንተዝነብር፡ ክውገድ ምተኽኣለ ነይሩ ይመስለኒ። ስለዚ ድማ ኢና፡ ክሳብ ክታበት እንረክብ ናይ ጥዕና መልእኽትታት ናብ ህዝቢ ምስዳድ ክንቅጽል ዘድልየና” ኢሉ።

    “እቲ ኣብ ገለ ግዝኣታት ዝተርኣየ፡ ንገለ መቆጻጸሪታት ሸለል ብምባል ናብ ዝቕጽል መድረኽ [ምፍኳስ ቀይድታት ዕጽዋ] ምህዋኽ፡ መልከፍቲ ብልዑል መጠን ክውስኽ ገይሩ’ዩ” ኢሉ።

18. 29 ሓምለ 2020ሶማልያዊ ጋዜጠኛ፡ ኣብ ፌስቡክ ብዝጠቀዖ ኮሮናቫይረስ ዝምልከት ጽሑፍ ማእሰርቲ ተፈሪድዎ

19. 29 ሓምለ 2020ሰራሕተኛታትና ካብ ቤት ጽሕፈት ክሰርሑ ኢና ንደልይ፡ ባርክለይስ

    

    ምንጪ ስእሊ, Getty Images

    ዋና ኣካያዲ ስራሕ ባርክለይስ ባንክ፡ ጀስ ስታሊይ፡ ካብ ገዛ ዝሰርሑ ዘለው ሰራሕተኛታቱ ናብ ቤት ጽሕፈት ክምለሱ ከም ዝደልይ ሓቢሩ።

    ንሱ ምስ ብሉምበርግ ቲቪ ኣብ ዝገበሮ ቃለ መሕትት፡ “ሰባት ኣብ ሓደ ስፍራ ኮይኖም ብሓባር ክሰርሑ ኣገዳሲ እዩ” ኢሉ።

    60 ሽሕ ሰራሕተኛታት ባርክለይስ ካብ ገዛ ይሰርሑ ከም ዘለው ዝገለጸ እቲ ሓላፊ፡ ካልኦት 20 ሽሕ ካብ ኣብያተ ጽሕፈትን ጨናፍራትን እቲ ባንክ ይሰርሑ ከም ዘለው ተዛሪቡ።

    ንሱ ኣብ ወርሒ ሚያዝያ ኣብ ዝሃቦ ርእይቶ ግና፡ ደጊም ኣብ ዓበይቲ ኣብያተ ጽሕፈት ኮይንካ ምስራሕ ግዚኡ ዝሓለፎ እዩ ክብል ተሰሚዑ ነይሩ።

20. 29 ሓምለ 2020ትራምፕ፡ ዝተኸልከለ መድሓኒት ኮሮናቫይረስ “ይሰርሕ’ዩ” ኢሉ ይምጉት

    

    ምንጪ ስእሊ, EPA

    ሃይድሮክሲክሎሮኪን ዝበሃል መድሓኒት ዓሶ፡ ንኮሮናቫይረስ ክከላኸል ይኽእል እዩ ብዝብል ተስፋ፡ ፈተነታት ይግበር ነይሩ።

    ጸኒሑ ግን፡ ኣብ ኣመሪካ እቲ መድሓኒት ብወግዒ ንሕክምና ኮሮናቫይረስ ከይውዕል ተኸልኪሉ እዩ።

    ፕረዚደንት ኣመሪካ ዶናልድ ትራምፕ፡ ብዛዕባ’ዚ መድሓኒት እዚ ደጋጊሙ እዩ ዝዛረብ ነይሩ።

    ሕዚ’ውን፡ ዋላ’ኳ እቲ መድሓኒት ኣብ ጥቕሚ ከይውዕል፡ ሰብመዚ ጥዕና ኣመሪካ እንተኸልከሉ፡ ፕረዚደን ትራምፕ ግን፡ "እቲ መድሓኒት ይሰርሕ እዩ" ዝብል ሓሳብ የንጸባርቕ ኣሎ።

    እኳደኣስ፡ እቲ መድሓኒት ተኸልኪሉ ዘሎ "ነቲ ሓሳብ ኣነ ስለዘቕረብኩዎ እዩ" ይብል።

    ንምሉእ እቲ ዛንታ ኣብ'ዚ ኣንብብዎ።