'ИШИД қўлидан муҳим Манбиж тортиб олинди'

АҚШ дастагида Курд ва Араб исёнчилари ўзини "Исломий Давлат" деб атайдиган гуруҳ назоратида бўлиб келган Суриянинг стратегик муҳим саналган Манбиж шаҳрини тортиб олганлар, дея хабар тарқатмоқдалар фаоллар.

Манбиж Туркиянинг жанубий чегарасига яқин муҳим йўллар чорраҳасида жойлашган шаҳар ва 2 йилдан буён ИШИД қўлида эди.

Манбиждаги йўллар ИШИДнинг асосий қароргоҳи бўлган Суриянинг Раққа шаҳри, Туркияга элтувчи йўл ва Ҳалаб вилоятига чиқишга имкон беради.

Бу йўллар "Исломий Давлат"га жангариларини бир ердан иккинчи жойга кўчириш, Суриядан ташқаридан қурол-яроғ олиб кириш ва ўзларининг назорати остидаги ҳудудларга тарқатиш имкониятини бериб келган.

Манбиж шаҳри учун жанглар икки ой олдин бошланган эди.

Таркибида кучли Курд жангчилари бўлган ва Сурия Демократик Кучлари деб аталган жангчилар иттифоқига АҚШ ҳаво зарбалари билан ёрдам бериб келган.

Июн ойидаги қаттиқ жанглар ортидан Манбиж шаҳри ИШИДга қарши кучлар томонидан қамалга олинган ва ташқаридан узилган эди.

ИШИД жангарилари шаҳар ичидаги биноларда ўрнашиб олишган ва қуролли қаршиликлар кўрсатишган.

ИШИДнинг бундай мудофаа мавқеъларини АҚШ ҳаво ҳужумларига тутган.

Июл ойидаги ҳаво ҳужумларидан бирида Манбиждан ташқаридаги қишлоққа чиқишга уринган ўнлаб тинч фуқаролар, жумладан, 11 бола ҳам ҳалок бўлган эди.

Лондонда жойлашган Сурия Инсон ҳуқуқларини кузатиш марказининг Манбиждан олаётган хабарларига таяниб маълум қилишича, шаҳар марказида ҳамон кам сонда ИШИД жангарилари қолмоқда.

ИШИДга қарши урушаётган ҳарбий коалиция сўзчиси Шарфан Дарвиш айтишича, Манбиж шаҳрининг 90 фоизи ўзларининг назоратидадир.

Айни пайтда БМТ Манбиж атрофида тинч фуқаролар учун вазият жуда оғирлашгани, 70 минг одам қамалиб қолгани ҳақида огоҳлантириш билан чиққан.

Бир кун олдин АҚШ Президенти Барак Обама Сурия ва Ироқ ҳудудларини эгаллаган ИШИД жиддий заифлашгани, охирги 1 йилда бирорта ҳам йирик ҳарбий ҳужумни уюштиришга қодир бўлмаганини айтган.

Гуруҳ ўз назорати остидаги катта ҳудудларни йўқотган, лекин эътиборини хориждаги ҳужумларга йўналтирган, деб айтган Президент Обама Пентагонда АҚШнинг энг юқори лавозимли ҳарбий ва хавфсизлик хизматлари раҳбарлари билан учрашувдан кейин.

Ироқ, Франция, Олмония, Бангладеш ва бошқа мамлакатлардаги қатор ҳужумлар учун ИШИД масъулиятни ўз зиммасига олиб баёнот тарқатган.

АҚШ президенти айтишича, ИШИД яқин орада ўзининг Ироқдаги асосий қароргоҳи бўлган Мосул шаҳри ва Суриядаги Раққа устидан назоратини йўқотади.

Би-би-си Ўзбек хизмати билан Whatsapp, Telegram ва Viber орқали боғланишни истасангиз, телефонимиз:+44 78-58-86-00-02

ТЕЛЕГРАМДА ЭСА каналимиз - https://telegram.me/bbcuzbek

Instagram - BBC UZBEK

Twitter - BBC UZBEK

Odnoklassniki - BBC UZBEK

Facebook - BBC UZBEK

Google+BBC UZBEK

YouTube - BBCUZBEK (https://www.youtube.com/user/bbcuzbek)

Skype - uzbekbbclondon

bbcuzbek.comга тўсиқ бўлса, uzbekweb.netга киринг.