Dh'innis Iomairt na Gàidhealtachd is nan Eilean gun tèid seachd aonadan ùra gnothachais a thogail ann am Baile a' Mhanaich.
Tha seo mar phàirt de phlana gus barrachd ghoireasan den leithid a stèidheachadh air feadh na Gàidhealtachd is nan Eilean.
Bha HIE air innse mar-thà an t-seachdainn seo gun tèid ochd aonadan gnothachais a thogail san Àth Leathann mar phàirt den phlana.
Tha dearbhadh ann a-nise air seachd aonadan ann am Baile a' Mhanaich.
Bidh iad ann an Raon Gnothachais Eabhal.
Iarrtas
Chaidh còig aonadan a thogail an sin ann an 2020 is iad uile air an cleachdadh.
"Tha tòrr chompanaidhean beaga airson a bhith a' fàs, ach 'son fuireach san sgìre ionadail aca agus barrachd dhaoine fhastadh", thuirt manaidsear sgìreil HIE anns na h-Eileanan an Iar, Joanna Peteranna.
"Feumaidh iad làraichean a tha freagarrach, is feumaidh làraichean a bhith ann cuideachd 'son gnothachasan ùra a thàladh chun nan eilean.
"Chunnaic sinn iarrtas mòr 'son aonadan Bhaile a' Mhanaich roimhe agus cuidichidh a' phròiseict seo gus an t-iarrtas sin a shàsachadh", thuirt i.
Chaidh na h-aonadan a dhealbh leis a' chompanaidh ionadail Fraser Architecture ann am Baile a' Mhanaich.
